【會員投稿 –「太」讀男】
2024年已經過左1/4, 每年年頭大家都會嘗試去設立目標, 唔知大家又有無趁哩個時間去Reflect一下自己呢? 睇下自己係咪仲係正確既道路上? 睇下自己係咪有咩可以做得更好? 不過今日太讀男並唔係想同你分享如何有效地完成你既目標, 太平山3月月會既米媽分享, 係哩方面已經講左好多。 太讀男今日係想為你係1/4哩個中途加油站打打氣, 教你如何更有效地恢復體力, 令你可以繼續衝刺。
「唉！好攰呀！」 如果你今年不奇然會同自己講哩句說話, 接下來哩本書就好適合你睇。 「最強疲勞恢復法」，係由日本首席體能訓練師寫既書，人既疲勞係可以分為身體上同心靈上，以下我將會分開哩兩個部份去介紹
Blue Monday，大部份人都會覺得係因為放完假，要重新pick up工作既狀態，就好似年初四咁既樣，但原來Blue Monday係有科學根據，了解到固中元素，就可以有效去解決。
星期五呀～係星期五呀！大家有無聽過哩段錄音？ 佢果種興奮既心情完全係反映緊香港人既心聲，每逢去到星期五，大家都會約朋友既約朋友，玩既玩，煲劇既煲劇，你總會夜過平時訓，第二日會遲過平時起身，然後身體會出現生理時鐘既延遲。 當你星期一朝早起身返工既時候，由於生理時鍾仲係延遲緊，無法消除倦怠感，哩個現象稱為「社交時差」，而社交時差，就係造成Blue Monday既元兇。
為左解決哩個問題，作者建議大家就算係週末都係，都應該維持返平日作息既生理時鐘 (專業既運動員係唔需要訓練既時間，都會維持平日作息)，就算想懶床，都最好唔超過一小時。 但如果大家連週末都咁早起身，頂唔順咁點算呢? 作者都有建議以午睡代替，而時間最好係少於30分鐘，絕對唔可以俾自己進入深度睡眠既狀態，有研究指出，小睡對於消除疲勞、提高注意力同增加工作效率方面都非常有效。
除左調整作息時間外，運動都佔左一個好重要既部份。運動最主要既作用係令透過負重同有氧既運動，令自己身體唔容易感到疲勞。所以我地需要係攰得岩岩好，而唔係Chur爆自己。 大家可能都有聽過，人體既中樞神經為左保護身體，有時會發出假既訊號俾身體，讓身體知道我地已經唔得啦，再郁就會死架啦，但果一刻其實身體係未到極限。 而當我地透過運動訓練既時候，其實係可以話返俾中樞神經知道我地身體「仲可以」，透過時間既累積，慢慢地去提高身體既上限同中樞疲勞既體力。
最後，關於心靈上既疲勞，最主要係來自壓力，而壓力好多時候係由認知偏差造成。認知偏差，換個角度可以話係我地理解事情既方式。好簡單舉個例，有人會話有危就會有機，但有人見到危，就會覺得好大壓力。 前者興緻勃勃去挑戰，後者身心疲累想逃避。 容易有認知偏差既諗法通常係非黑即白，以偏概全。大家可以嘗試記錄一下每日令自己感到有壓力既事，嘗試再一次去理解或者換個角度思考。如果依然感到有壓力，可以搵朋友傾下計，或者做下冥想，對於心態既轉變非常有幫助。 太讀男認為通常有認知偏差既人，偏偏係好難察覺到自己有，不坊搵多啲身邊既朋友傾下計，而我都非常歡迎大家搵我聊聊天談談心。
希望有幸讀到哩篇文章既各位，係2024年接下來既時間，可以用最好既狀態完成你地每一個目標。
撰文：讀男