【會員投稿 –「太」讀男】
「太」讀男每年都係訂立閱讀既目標俾自己，今年希望透過每月一篇，除左透過分享可以令自己更加熟習內容外，都可以透過分享，令到大家新一年有唔同方面既進步，終極目標係想每個人都可以建立閱讀既習慣。
提到習慣，2023年最多人講既其中一本書，一定係《原子習慣》，亦都係讀男第一本想同大家分享既書。
習慣，不論好與壞，都唔可以睇少，因為我地既人生就係由每一個小習慣，長年累月地建構而成，所以一個完善既習慣系統對我地黎講非常重要，通過建立各個微小既習慣，實現長期持續既改變。
作者透過4個簡單既步驟，讓我地更容易建立習慣
讓提示顯而易見 (提示)
讓習慣變得吸引 (渴望)
讓行動輕而易舉 (回應)
讓獎賞令人滿足 (獎賞)
以「學英文」作為例子
提示 – 可以「重新設計環境」或者 「具體行動計劃」
例如將英文書擺係屋企當眼位置，或者將學英文APP學係手機當眼處，然後規定自己每日晚上十點，在睡房閱讀10分鍾
渴望 – 將想做既事同需要做既事捆綁埋一齊
例如本身好鍾意飲咖啡，你可以自己每朝幫自己沖一杯咖啡，同時閱讀英文5分鍾
回應 – 善用「最小努力原則」，令件事簡單到可以不停「重複」做
例如話俾自己聽每晚睇10頁書，或者聽2分鐘podcast，睇2分鐘YouTube，當你開始做2分鐘你好大機會會繼續睇落去，又或者維持每日2分鐘，不停重複去做。
獎賞 – 幫自己建立「立刻既獎賞」 或者 習慣追蹤
例如你可以一個日曆app或者實體日曆上，每日自己學習完後，就係上面打個剔，當自己睇返每一日都有學習既時候，會有滿足感。
同時可以獎勵自己一星期7日都有學習的話，就買包靚咖啡粉獎賞自己。
然而，好多人建立左習慣迴路後，但唔能夠持續去做，所以除左以上4個簡單步驟外，仲有一個大重點，就係改變(建立)你自己既身份認同。
每一個行動背後都有支持既價值觀，同身份認同不相符既行為習慣是無法長久，內在動機與個人價值觀既終極型態是讓習慣成為身份既一部分。
以下有一個大家都聽過既例子 (兩個想戒煙的人) :
我正在戒煙：以結果為基礎既習慣論述 (同自己講我係吸煙者, 正嘗試唔食煙)
我不抽煙：以身份認同為基礎既習慣論述 (同自己講我係健康既人, 所以我唔食煙)
以上兩個結果一樣既論述，分別同緊自己講係吸煙者同埋自己係健康既人，身份認同既分別，會直接影響到你能唔能夠建立一個長久持續既習慣。
「太」讀男再以「健康既人」作為例子
假設你想減肥，你不停去健身，但結果出黎可能一兩個月都無成果，咁就好容易放棄
但如果你建立一個身份認同，你同自己講要成為「健康既人」，除左健身之外，你知道「健康既人」仲會控制飲食同早睡早起等等。
結果你成為左「健康既人」，減到肥係帶黎既其中一個成果！
撰文：讀男